يا جماعة عيب الحكي إنه الانفجار مُفتعل، أوإنه شَبَه طُقيع الثوم... اغتيال يا ناس اغتيال! (والله امه داعيتله في ليلة كحلية) والحمدُ لله فَرَج، غُمة وانزاحت، ما بعد فرج إلا الحمد الله (قصدي ما بعد ضيقة إلا فرج). كشيلنا قاعدين بدنا الرئيس يحط نائب (عشان بعد عمر طويل لًو لًو لًو...) إلا بتجينا قصة لُغُم "رامي" و"فرج"... ومنحفرة لـ دُحديرة! كأنه بحياتنا فش جديد، فش أكشن، فش مصالحة، فش زيارات ع غزة أصلاً إلا من الوزراء الي شربوا من غزة.. وآخر مرة راحوها بعد ضغط المصريين (ما منيجي غير بالرص)، مش فاهمة ليش حكومة الوفاق بدهاش وفاق.. قصدي بدهاش تروح ع غزة كتير ( أنا بقول لحقوها قبل الشوووب والرطوبة!) طيب رايحين تفتحوا محطة تنقية المياه دافعين عليها بلاوي.. وماله لازم تروحوا وتجُخوا عالحماميس (الي ما سخيوا يأمنوا الطريق الي جاي منها موكب الحمد الله (وفرج.. بضل أنساه مش عارفة ليش!!!)، بس هاي تعليمة يا حماس!! المهم متفجرات بالطريق، اشي انفجر واشي لا (محسود!) ناس بتقول صار اشتباك مسلح وطخطخة وناس بتقول لا، في مصابين ويمكن لأ!.المهم كمَّل الموكب طريقه وافتتحوا المحطة، والمصابين ظلوا يستنوا في سيارات الاسعاف الي كانت موجودة... بس يبدو اكتمل الفيلم بصورة لـ"فرج" بالمشفى الاستشاري. (بس لأنه الاصابات بسيطة لو رحتوا عند ام فايز كان احسن) نيالهم تعالجوا بالاستشاري، مشفى خااص (ونتسخمط نحن في مشافي الحكومة.. مش مهم!). الخلاصة: مين الي عملها؟ اذا قلتوا دحلان: فبقلكم إنه مشكلته مع سيادته مش دولته.. مع انه قال عن جديد "إنه مش بديل لعباس"، عفكرة ما حدا سألك! بس وين هالغيبة يا ابو فادي؟ انت وجماعتك نازلين قصف بالقيادة ونهجها... وين ما سمعنا لهلء عن أي حل سحري للقضية والمشاكل الي عنا. واذا كانوا حماس: فهم صحيح تخصص صواريخ بتعمل حفرة كبيرة في الأرض... بس الصراحة متفجراتهم بِتمَوِّت.... هلكيت هم تركوها سارحة بدون أمن وحراسات في منطقة بيت حانون يعني إلهم إيد (مش تهمة ولا تهديد بس اجابة فيها تمويه) مين ظل؟ فرج! صح مرة عمل حادث في حاله عشان ما يروح ع جنازة بيريس بس ما بيعملها مع غيره. أما"الحمدَ الله"صحيح خاف من صورة عالحاجز.. بس معقول يعمل في حاله فيلم أكشن (بطل ما بموت وفرد ما بيخلص)!يا جماعة استهدوا بالله... الموضوع أكبر من هيك، فيه ايادي عُليا!! بس الّي قاهرني الصور الي نزلوها الاسرائيليين للمنفذين في منطقة بيت حانون! هون عتبنا ع فرج: يا زلمة الّي بتنسق معهم معقول خانوك؟ معقول تشوف كاميراتهم المنفذين وما يخبروك؟ وين التنسيق الأمني؟ وين المسجات؟ وين التلفونات؟ كشيلنا طلع التنسيق باتجاه واحد.. أنا بقول ما تسكتلهم؟ وما تخاف لأنه قرارات المجلس الثوري والمركزي وابصر مين بالنسبة لوقف التنسيق الأمني كلام عالورق.. بس هاي العملة كبيرة يا باشا، أنا مع تِحرَد (إما بتضل غضبان أو بترجع ندمان).. يلا يا حكيم هالزمان (زمان حكومة الصورة، وفيلم كله ألغام... كشله هالشعب الغلبان.
http://www.alhourriah.ps/article/49502
